Mjadala kuhusu mustakabali wa uongozi wa kisiasa katika eneo la Mulembe umechukua mkondo mpya baada ya viongozi kadhaa kuanza kumtaja Katibu Mkuu wa ODM Edwin Sifuna kama mmoja wa viongozi wanaoweza kuiongoza jamii hiyo kuelekea uchaguzi mkuu wa mwaka 2027.
Akizungumza katika Kaunti ya Bungoma, Seneta wa Kakamega Boni Khalwale alisema jamii ya Mulembe inahitaji mwelekeo mpya wa kisiasa na kumtaja Sifuna kama kiongozi mwenye uwezo wa kuibeba ajenda ya eneo hilo katika siasa za kitaifa.
Khalwale alidai kuwa viongozi wa sasa wa ngazi ya juu kutoka eneo hilo, akiwemo Mkuu wa Mawaziri Musalia Mudavadi na Spika wa Bunge la Kitaifa Moses Wetang’ula, hawajafanikisha kikamilifu matarajio ya wakazi wa Magharibi mwa Kenya, hali ambayo imechangia kuibuka kwa mjadala wa kutafuta sura mpya ya uongozi.
Kauli hiyo iliungwa mkono na Gavana wa Trans Nzoia George Natembeya ambaye alisema jamii ya Mulembe iko tayari kuwaunga mkono viongozi watakaosimamia maslahi ya wananchi na kuleta mabadiliko ya kweli katika eneo hilo.
Sifuna pia alipata uungwaji mkono kutoka kwa Mbunge wa Bumula Wanami Wamboka pamoja na mwanasiasa mkongwe Dkt Noah Wekesa. Viongozi hao walieleza kuwa ushawishi wake unaendelea kuongezeka katika siasa za Magharibi mwa Kenya.
Hatua hiyo inaashiria kuanza kwa mijadala mipya kuhusu mwelekeo wa kisiasa wa jamii ya Mulembe huku viongozi wakijipanga mapema kuelekea uchaguzi mkuu wa mwaka 2027.
