Zaidi ya Wakenya milioni 31.5 wamejisajili chini ya Mamlaka ya Afya ya Jamii (SHA), huku serikali ikisisitiza kuwa mpango huo unaendelea kupanua upatikanaji wa huduma za afya nchini.
Akizungumza wakati wa maadhimisho ya Sikukuu ya Madaraka katika Kaunti ya Wajir, Rais William Ruto alisema kati ya waliojisajili, zaidi ya watu 800,000 wanatoka katika kaunti za Wajir, Garissa na Mandera.
Rais alieleza kuwa SHA ni mojawapo ya mageuzi makubwa zaidi katika sekta ya afya tangu Kenya ipate uhuru, akisema mpango huo umechangia kuimarisha upatikanaji wa huduma za matibabu kwa wananchi wengi.
Kwa mujibu wa Rais, SHA tayari imelipa hospitali shilingi bilioni 8.1 kwa huduma zilizotolewa kwa wananchi katika kaunti hizo tatu, hatua aliyosema imeimarisha utoaji wa huduma za afya na kupunguza changamoto za kifedha katika baadhi ya hospitali.
Hata hivyo, utekelezaji wa mpango huo umeendelea kuzua hisia tofauti miongoni mwa Wakenya. Wafuasi wake wanasema umesaidia wananchi wengi kupata huduma za matibabu kwa urahisi zaidi, huku wakosoaji wakidai kuwa baadhi ya wananchi bado wanakumbana na changamoto za usajili na upatikanaji wa huduma.
Baadhi ya hospitali pia zimeripoti changamoto za malipo ya madai ya huduma zilizotolewa awali, jambo ambalo limeibua mjadala kuhusu ufanisi wa mfumo huo. Serikali kwa upande wake imeendelea kuhimiza wananchi kujisajili na kuahidi kushughulikia changamoto zinazojitokeza katika utekelezaji wa mpango huo.
