Chama cha ODM kimeanza maandalizi ya kuimarisha mfumo wake wa uteuzi wa wagombea kuelekea uchaguzi mkuu wa mwaka 2027 kwa kutuma viongozi wa kamati yake ya uchaguzi kujifunza kutoka vyama vya siasa vya mataifa mengine ya Afrika.
Viongozi hao wanatarajiwa kusafiri hadi Afrika Kusini kujifunza jinsi chama tawala cha African National Congress (ANC) kinavyoendesha uteuzi wa wagombea wake, huku ujumbe mwingine ukielekea Ghana kwa lengo kama hilo.
Mwenyekiti wa Kitaifa wa ODM, Gladys Wanga, amesema hatua hiyo inalenga kusaidia chama kuandaa mfumo wa uteuzi ulio huru, wa haki na unaoaminika baada ya changamoto zilizoshuhudiwa katika chaguzi zilizopita.
Wakati huo huo, ODM imeanzisha mikutano ya mashinani katika maeneo mbalimbali nchini ili kuimarisha mtandao wake wa kisiasa na kuongeza ushawishi wake kabla ya uchaguzi mkuu wa mwaka 2027. Baada ya mkutano mkubwa uliofanyika Kisumu, chama hicho kinapanga kufanya mikutano mingine katika maeneo ya Magharibi, Turkana na Narok.
Aidha, kiongozi wa chama hicho, Oburu Oginga, ameongeza juhudi za kuwaunganisha wanachama wa sasa na viongozi wa zamani wa chama. Hivi majuzi alikutana na Anyang’ Nyong’o, ambaye aliwahi kuwa Katibu Mkuu wa kwanza wa ODM.
Katika kikao cha hivi karibuni mjini Mombasa, ODM iliagiza kamati yake ya uchaguzi kuweka mifumo madhubuti ya kuhakikisha uteuzi wa wagombea unakuwa wa haki na wa kuaminika. Chama hicho pia kimetangaza kuwa hakitatoa tiketi za moja kwa moja kwa wagombea, hatua inayofuatia ripoti ya ukaguzi wa ndani iliyobaini kuwa mfumo wa kidijitali uliotumika katika uteuzi wa mwaka 2022 ulivurugwa na kunufaisha baadhi ya wagombea kwa njia isiyo halali.
