Mahakama Kuu imeamua kuwa baadhi ya vifungu vya Sheria ya Makosa ya Kujamiiana haviwezi kutumika kuhalalisha mashtaka dhidi ya vijana walio katika mahusiano ya kimapenzi ya hiari bila shuruti na walio karibu kwa umri.
Jaji Bahati Mwamuye alisema utekelezaji wa vifungu vya 8, 9 na 11 vya sheria hiyo dhidi ya vijana wanaohusika katika mahusiano ya hiari yasiyo ya unyonyaji unakiuka haki za kikatiba ikiwemo usawa, utu, faragha, afya na haki za watoto.
Mahakama ilisema adhabu za jinai hazifai kutumika pale ambapo hakuna ushahidi wa unyonyaji, vitisho, dhuluma au tofauti kubwa ya mamlaka kati ya vijana hao.
Katika maagizo yake, mahakama ilielekeza vyombo vya uchunguzi, mashtaka na utekelezaji wa sheria kutofautisha kati ya mahusiano ya hiari ya vijana na visa vinavyohusisha shuruti, unyonyaji au matumizi mabaya ya mamlaka wakati wa kushughulikia kesi za makosa ya kingono zinazohusisha watoto.
Ofisi ya Mkurugenzi wa Mashtaka ya Umma pia imeagizwa kuandaa na kuchapisha mwongozo rasmi kuhusu namna ya kushughulikia kesi za mahusiano ya hiari ya vijana ili kuhakikisha uwazi na kufuata viwango vya katiba.
Huduma ya Kitaifa ya Polisi nayo imeelekezwa kupitia upya taratibu zake za ukamataji na uchunguzi wa kesi za makosa ya kingono zinazohusisha watoto ili ziendane na misingi ya katiba iliyotolewa katika uamuzi huo.
Mahakama pia imeagiza taasisi husika za serikali katika sekta za afya, elimu na ulinzi wa watoto kuandaa sera za pamoja zitakazowawezesha vijana kupata taarifa na huduma za afya ya uzazi bila hofu ya kutiwa hatiani.
Aidha, mahakama ilithibitisha amri za muda zilizotolewa Agosti 2025 za kusimamisha mwenendo wa kesi hizo na ikasitisha kabisa mashtaka katika kesi mbili zilizokuwa zikisikizwa katika Mahakama ya Makadara kwa kiwango ambacho zilihusisha mahusiano ya hiari yasiyo ya shuruti wala unyonyaji kati ya vijana.
